Хъæууонхæдзарадон кондад райрæзын кæныны ахсджиаг къабаз у фосдард. Нæ республикæ аграрон зонæ кæй у, уымæ гæсгæ дзы æппæт фадæттæ дæр ис йæ райтынг кæнынæн. Фæлæ æрмæст фадæттæ фаг не сты. Фосдарды æнтыст бирæбæрцæй кæнгæ у, цахæм æркаст сæм уа, зооветслужбæ цахæм æмвæзадыл æвæрд уа, афтæ ма сæм куыд зылд цæуа, уымæй.
Раздæры колхозтæ æмæ совхозты цы мингай ставдкъах æмæ лыстæгкъах фос уыдис, уыдон нал сты. Цы фермерон хæдзарадтæ фæзындысты, уыдоны фосы та, хъыгагæн, нырма нымайæм дæсгæйттæй. Фæлæ уымæй нæ ветеринарон кусджытæн сæ куыст нæ фæкъаддæр. Цæрджытæн фадат фæцис сæ хисæрмагонд хæдзарадты райтынг кæнынæн æмæ раздæры азтимæ абаргæйæ райдыдтой бирæ фылдæр фос дарын. Уыимæ ма республикæмæ ивгъуыд азы кæрон ласт æрцыдысты мингай стуртæ æмæ фыстæ.
Æппæт уыцы фосмæ республикæйы сæйраг ветеринарон дохтыр Лолаты Владимир куыд зæгъы, афтæмæй фæстаг азты цæуы хуыздæр ветеринарон хъусдард. Уый тыххæй сæ фадæттæ дæр фæхуыздæр сты. Фæлæ фосæй кæй амæлы, уый бирæ хатт ветеринарон кусджыты аххос нæ вæййы.
Цæвиттон, Знауыры районы фысвос кæй мæлы, уымæн йæ аххосаг у, ацы аз мит раджы кæй æруарыдис æмæ æдзух мидæг конд кæй сты, уый. Цæрджытæй бирæтæн сæ фосæн нæ бантыст фаг холлаг æрцæттæ кæнын æмæ сæ зымæгыл сæмбæлдысты æдзæттæйæ. Фосæн та зымæг рæстмæ æмæ фаг холлæгтæ куынæ уа, уæд размæ нæ цæуынц, мæллæг кæнынц. Бирæхатт зымæг цы фос ныззайынц, уыдонæн дæр сæ цот амæлынц, æхсыр сæм кæй нæ вæййы, уый аххосæй.
Республикæйы сæйраг ветеринарон дохтыр куыд зæгъы, афтæмæй Знауыры районы кæй фос амардысты, уыдонæй сæ иу у Букуылты Алан.
- Уый анализ бахаста ветлабараторимæ æмæ йын разындис æцæгæйдæр хæцгæ низ листериоз. Куыд базыдтам, афтæмæй уымæн фаг холлаг не ‘рцыдис цæттæ йæ фосæн æмæ маамæлайы муртæй та фосæн нæй гæнæн дарæн. Зымæг ын фаг холлаг куынæ уа, уæд йæ организм слæмæгъ вæййы æмæ фæцуды йе ‘нæниздзинад æмæ йæм æмхиц вæййынц ахæм низтæ, куыд туберкулез, листериоз, бруцеллез æмæ æндæртæ дæр. Фæлæ мæн нæ уырны æмæ листериозæй фæрынчын сты, уый. Уымæн æмæ уыцы низæн йæ фыццаг миниу-джытæ сты: тæвд сæм вæй-йы, сæ нуæрттæ бахъыгдард вæййынц æмæ сæ бæрзæйтæ скъæдзтæ вæй-йынц. Æз рынчын фосæн сбарстон сæ тæвд æмæ сæм ахæмтæй ницы уыд. Фи-дарæй мæ бон у зæгъын æмæ фос холлагцух кæй æййафынц, фаг æркаст сæм кæй нæй æмæ сыл уыцы низтæ дæр уый ах-хосæй кæй стых сты.
Хуытæй дæр кæй мæлы, уымæн та йæ аххосаг у африкæйаг емынæ, фæлæ нын ныртæккæ уый фадат нæй æмæ дзы анализтæ сисæм. Уыдон аразынц æрмæстдæр горæт Владимиры. Фæлæ рынчын хуыты æууæлтæм гæсгæ уый у африкæйаг емынæ. Уымæн та æнæфæзынгæ нæ уыд, уымæн æмæ нæм фыццаг куы фæзынд, уæд кæрон-мæ тох не ‘рцыд ацы низы ныхмæ. Уымæн та уыд йæ-хи аххосæгтæ…

БЕСТАУТЫ Валя

"Хурзаерин"