Æлбегаты Зелим æмæ Сланты Арсены хъуыддаг республикæйы цæрджытæ дзыхæй-дзыхмæ скъæфынц ныр цалдæр къуырийы. Абон дыууæ ирон сержантæн Дзæуджыхъæуы æфсæддон тæрхондоны рахастой кæронбæттæны уынаффæ. Лæппутæ сæхæдæг, сæ хиуæттæ æмæ æрдхæрдтæ уынаффæимæ разы не сты. Тæрхондоны раз абон адæм змæнтын райдыдтой. Бынаты куыста не сфæлдыстадон къорд дæр æмæ сæм байхъусæм.

Дзæуджыхъæуы æфсæддон тæрхондоны зал дзаг у адæмæй. Се `хсæн - тæрхон кæмæн хæссынц, уыцы дыууæ ирон сержанты хиуæттæ, æрдхæрдтæ æмæ журналисттæ. Алчидæр сæ йæ зæрдæ дары, лæппуты раст тæрхон кæй рахæсдзысты. Фæлæ сержантты хиуæтты хъынцъым тæрхонгæнæджы зæрдæ нæ фæфæлмæн кодта. Æлбегаты Зелим æмæ Сланты Арсены азымджынтыл банымадтой. Азымы дарджытæ домдтой дзырдæн тæрхон. Фæлæ уынаффæ рауад карздæр. Æлбегаты Зелимæн стæрхон кодтой æртæ азы æмæ æхсæз мæйы иумæйаг фæткимæ колонийы фæбадын. Байсдзысты ма йын йе `фсæддон цин, нæ йын уыдзæн паддзахадон оргæнты кусыны бар дæр. Сланты Арсенæн та рахастой афæдз æмæ æхсæз мæйы ахст адæмы цæрæн колонийы арвитынæн.

Тæрхонгæнæг цы тæрхон рахаста, уый адæмы банкъуысын кодта. Бæрæг куыд уыдис, афтæмæй Сланты æмæ Æлбегаты лæппуты хиуæттæ тæрхоны цыдимæ разы æппындæр нæ уыдысты. Абон сæ масты дзæкъул дæр уымæн атыдта. Сæ кæуын бауромын сæ бон нæ уыд.

Тæрхондоны уынаффæмæ гæсгæ Æлбегаты Зелимы æмбырды фæстæ æрцахстой. Слестгæнæн изолятормæ йæ аластой къухцæгты. Лæппуйы хæстæджытæ æмæ зонгæтæ змæнтын райдыдтой. Бынатмæ æрбахæццæ сты ОМОН æмæ пъæлицæйы кусджытæ.

Адæмы басабыр кæнын барадхъахъхъæнджыты бон куы нæ уыд, уæд тæрхондоны бæстыхай æрæхгæдтой. Æнæнхъæлæджы митинг саразджытæ та æрлæууыдысты рацæуæны ныхмæ æмæ Зелимы раласын нæ уагътой.

Тæрхондоны раз знæт адæм бабирæ сты. Сæ хъуыдымæ гæсгæ, лæппутæн тæрхон раст нæу. Æхсæнады уæнгтæ ныффыстой Уæрæсейы хъахъхъæнынады министр Сергей Шойгумæ фæдисы курдиат. Æххуыс сын кодтой суанг барадхъахъхъæнджытæ сæхæдæг.

Æлбегаты Зелим æмæ Сланты Арсен сæ азымыл сæхæдæг дæр нæ басастысты. Сæ тæрхон дæр растыл нæ нымайынц. Дæс боны дæргъы сын фадат ис абоны уынаффæйыл уæлдæр тæрхондонмæ бахъаст кæнынæн.
_