Бындур æвæрд æрцыд ног дыргъдонæн
24 июля 2019 Новости [версия для печати] [читать комментарии] [размер шрифта: a- | А+] [1117 просмотров]
Нæ республикæйы территорийыл, уæлдайдæр та дæлвæз бынæтты, хæрзвадат уавæртæ ис дыргъгуыст райтынг кæнынæн. Хъæууон хæдзарады ацы къабаз пайда кæй хæссы, æфтиагджын кæй у, уый ирдæй разынд советон дуджы азты. Зæгъын хъæуы уый, æмæ нæм цы иунæг Социалистон куысты Хъайтар уыд Сагкаты Григол, уый дæр ацы стыр хорзæх райста дыргъгуысты къабазы.Афтæ кæй у, уымæ гæсгæ ныртæккæ дæр ацы къабазмæ се ‘ргом здахын райдыдтой инвестортæ. Фæткъуыбæлæсты егъау дыргъдон сырæзт Цхинвалæн скæсæны ‘рдыгæй. Уый ныридæгæн тыллæг дæттын райдыдта. Æрæджы та Цхинвалы районы Къостайыхъæуы бындур æвæрын райдыдтой ног дыргъдонæн.
Дыргъдон саразынæн æдæппæт рахицæн кодтой 100 милуан сомы. Фæткъуыйы талатæ садзынмæдзы æрывнæлдтой ацы аз уалдзæджы. Дыргъдоны фæзуат у 45 гектары бæрц. Уымæй 18 гектары фæзуатыл ныссагътой 60 мин 450 фæткъуыйы талаты ахæм сорттæ, куыд «Голден». «Гала», «Нестор». Агрофирмæйы директор Бекъойты Леван куыд зæгъы, афтæмæй сæ æрластой Италийæ.
«Æнæкуыстæй ма дыргъдоны цы 27 гектары баззад, уым та фидæн уалдзæджы но-джыдæр ныссаддзыстæм 90 талайы. Зæгъын хъæуы уый, æмæ ацы фæткъуыбæлæсты сорттæ тыллæг дæттын кæй райдайынц фыццаг аз дæр. Æцæг сыл бирæ нæма æрзайы, фæлæ æртæ азмæ уыдон æххæстæй тыллæг радтынц æмæ иу гектарæй райсæн уыдзæнис 50 тоннæйы бæрц фæткъуытæ», — банысан кодта Бекъойы фырт.
Уый ма куыд зæгъы, афтæмæй фæткъуытæ уæй цæудзысты канд нæхи базæртты нæ, фæлæ ма нæ республикæйæн æддейæ дæр.
Ацы дыргъдонæн канд йæ дыргъты райст нæ уыдзæн ахъаз нæ республикæйы экономикæйы рæзтæн, фæлæ ма дзы 30 адæймагæн куысты бынæттæ кæй фæзынд, уый дæр стыр пайда у. Уый нысан кæны, уал цæрæгæн сæ царды уавæртæ кæй фæхуыздæр уыдзысты. Астæуккаг куыстмызд уыдонæн у 30 мин сомы бæрц. Дыргъдон тыллæг дæттын куы райдайа, уæд та сæ тонынмæ хуынд цæудзысты 100 адæйма-джы бæрц.
Ацы дыргъдон æппæт хъомысадæй куы скуса, уæд дзы æппынæдзухæй чи куса, дыргъдонмæ йæ хъус чи дара, ахæм кусджытæ уыдзысты 60 адæймаджы бæрц. Уыдонæн фæфылдæр уыдзæнис сæ куыстмызд дæр.
Ныртæккæ уал бæлæстæм зилынц бы-нæттон агрономтæ, кæцытæ сæрмагонд курсытæ бакастысты Уæрæсейы Федерацийы. Уымæй дарддæр ма инвестор йæхæдæг дæр Уæрæсейæ æрхоны, фæлтæрддзинад кæмæ ис ацы хъуыддаджы, ахæм агрономты æмæ сæ хъуыддагыл цайдагъ кæнынц ам, бынæттон кусджыты.
Дыргъдоны кусджытæ ныртæккæ архайынц, æмбæлон уагмæ йæ æркæныныл. Йæ территорийыл арæзт æрцыд донхæргæнæн бассейн. Æхгæд æрцыд йæ территори. Сæйраджы сæйраг та кусджытæ архайынц, сæ техникæ кæм уой, ахæм ангар саразыныл. Уыдон ма ноджыдæр сараздзысты ихæй сын сæ дыргъдон чи бахъахъхъæна, ахæм хызтæ.
«Бузныг нæ республикæйы Президент Бибылты Анатоли æмæ Уæрæсейы Федерацийы Хуссар Ирыстоны æххæстбарджын минæвар Гасситы Знауырæн, ацы проект саразынæн нæм стыр хъусдард кæй аздæхтой, инвестор ссарыны хъуыддаджы нын кæй баххуыс кодтой, уый тыххæй», — загъта Бекъойы фырт. Йæ хъуыдымæ гæсгæ зæрдæ дарæн ис, нæ республикæйы климатон уавæрты, сæ хъуыддаг йæ бынатæй кæй феггуырсдзæнис æмæ пайда кæй æрхæсдзæнис æмткæй нæ республи-кæйы экономикæйæн.
БЕСТАУТЫ Валя
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Комментарии (0)
-
-
9 / 20
-
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?