БÆРÆГБОН БÆРÆГБОНЫ ХУЫЗÆН
13 ноября 2018 Новости [версия для печати] [читать комментарии] [размер шрифта: a- | А+] [784 просмотра]
БÆРÆГБОН БÆРÆГБОНЫ ХУЫЗÆНМæ уарзон адæм!
Æрбахаццæ кæны не стырдæр бæрæгбæттæй иу – Уастырджимæ кувæн къуыри (Джеоргуыба). Куыд зонут афтæмæй, ацы азæй фæстæмæ Иры Стыр Ныхасы хъæппæрисæй, стæй республикæйы Парламенты закъон æмæ Битарты Вячеславы бадзырдæй, бæрæгбоны къуырийæн йæ фыццаг Къуырисæр уыдзæн улæфæн, æнæкусгæ бон. Уыцы бон алы бинонтæ дæр хæдзары скæнынц æртæ кæрдзыны, скувынц Хуыцау æмæ Уастырджимæ, бинонты сыл бафæдзæхсынц. Цæмæй къуырисæры куысты фарстатыл ма тыхсæм, бæрæгбонмæ фæскуыст тагъд-тагъдæй ма цæттæ кæнæм, растдæр уыд бæрæгбон паддзахадон закъонæй сфидар кæнын. Нæ фыдæлтæ дæр ацы бон кусгæ нæ кодтой.
Фæлæ Парламент æмæ республикæйы Сæргълæууæгмæ цы курдиат балæвæрдтам, уымæн ма уыди ноджы æндæр нысаниуæг дæр. Фыццаджыдæр, кæд Джеоргуыба у ирон бæрæгбон, уæддæр æм хъуамæ æрхонæм немæ хæларæй чи цæры, уыцы иннæ адæмты минæвæртты дæр. Сыхбæсты, хъæубæсты мидæг хъуамæ кæрæдзийы дихтæ ма кæнæм. Скæнæм æппæтадæмон, иугæнæн бæрæгбон.
Иннæмæй та,
Иры Стыр Ныхасы фидæр хъуыдымæ гæсгæ, бæрæгбон хъуамæ айдагъ фынджы уæлхъус ма ацæуа. Нæ фыдæлты Фарн æмæ зондахастæй спайда кæнæм. Кæд кувгæйæ фæзæгъæм, Уастырджи байрагæй бæх кæны, лæппуйæ та – лæг, уæд хъуамæ нæ рæзгæ фæсивæд уыцы бон рох ма уой. Уыдон сты нæ фидæны бæлццæттæ, Фыдыбæстæ хъахъæнджытæ, Ирыстонæн кад æмæ намыс хæсджытæ, нæ цард аразджытæ. Кæд нæ фыдæлтæм æртæазыдзыд лæппу лæджы бындзæфхадыл нымад уыди, уæд абон дæр нæ кæстæртæм хъуамæ уыцы цæстæй кæсæм, ахуыр сæ кæнæм Æгъдауыл, ирон лæджы дæсныйæдтыл, царды зындзинæдтæн фидар лæууыныл.
Уый фæдыл сидын нæ куырыхон уынаффæгæнæг хистæртæм. Уæ хорзæхæй, æрбаввахс кæнут уæ сыхбæстæты кæстæрты уæхимæ, таут сыл нæ фыдæлты Фарн. Дардæй кæсгæйæ дзы нæ фæхъæстæ уыдзысты. Арвитæм ацы бон æцæг бæрæгбоны хуызæн: саразæм кæстæртæн ерыстæ, ирон хъæзтытæ, хъастизæртæ. Æнæмæнг нæм хъæппæрисджын сылгоймæгтæ дæр фæкæсдзысты бацæттæ кæнынмæ. Фæлæ алцыдæр у аразгæ кæртыты хистæртæй. Уæ хорзæхæй, равдисут уæ лæгдзинад.
Сыхбæстæйы фæсивæдæн кармæ гæсгæ ис саразæн мæнæ ахæм ерыстæ:
- Чысыл къордтæй бæндæн хаххы сæрты ивазын
- Дыууæйæ ивазæнтæй ерыс кæнын (лæдзæг кæрæдзийы къухæй исын)
- Армæй хæст (армрестлинг)
- Уæзтæ исын (16 кг., галиу æмæ рахиз къухæй)
- Чысыл къордтæй дугъ (командная эстафета)
- Барджыты тох, дыгæйттæй кæрæдзийы æккойы бадгæйæ, чи кæй аппарайæ ерыс.
- Нæуыл дур æппарын (1.5-3 кг). Чи дарддæр фехса дур.
Ацы номхыгъдмæ ма бафтауæн ис бирæ æндæр ерыстæ, сыхы цæрджытæн сæхи уынаффæмæ гæсгæ. Ерысты чи фæуæлахиз уа, уыдонæн скæнын хъæуы исты зæрдылдарæн лæвæрттæ. Уымæн бирæ æхца нæ бахъæудзæн, æмæ амалхъом цæрджытæ сæхи номæй фæсивæдæн фæйнæ чысылы куы схардз кæной , уæд сын адæмы Фарн æнæмæнг дарддæр æххуысгæнæг уыдзæн. Хорз уыдзæн, хистæртæ уыдонæн æмæ ерысты уæлахиздзаутæн фынджы уæлхъус дæр сæрмагондæй куы раарфæ кæной, уæд.
Кæстæр лæппутæн ис бацамонæн гудайæ хъаст æмæ бирæ æндæр рагон ирон хъæзтæтæ. Æххуыс кæй хъæуа, уыдонæн сæ бон у æрбадзурын кæнæ æрбацæуын Иры Стыр Ныхасмæ, кæнæ та уæ районы Ныхасы сæрдармæ.
Æнæмæнг спортивон ерыстæй уæлдай алы кæрты дæр фæсивæдæн хъæуы саразын хъазтизæр. Фæндырдзæгъдджытæ нæм абон бирæ ис, куынæ уа, уæд та нырыккон электрон фæрæзтæй дæр ис спайда кæнæн. Цы ис хуыздæр уыцы бон алы кæртæй дæр ирон цагъд æмæ зарæг куы хъуысой, уæд. Кæд уæ уæ бæрæгбоны рæсугъддзинад æмæ фарн бафæнда равдисын телеуынынады æмæ газетты, уæд иу нæм рагацау æрбадзурут мæнæ ацы телефонтæм: 53-99-18, 53-57-87.
Уæ хорзæхæй, бахизæм нæхи фыднозт æмæ фыдхæрдæй, æнæгъдаудзинадæй. Нæ фыдæлтæм уыдон уыдысты худинаг. Хуыцау æмæ Уастырджимæ кувут бæгæныйæ, незамантæй нырмæ уымæй кадджындæр нозт нæ уыди ирон адæммæ. Карз нозтæй зонæм бæрц, ма дзы хатæм тыххæй кæрæдзимæ, ма æфтауæм нæхи кæстæрты цæсты. Хистæр йæхæдæг æгъдаухæссæг æмæ æгъдауæвдисæг куынæ уа, уæд æм кæстæр никуы байхъусдзæн, бон изæрмæ йын раст ныхæстæ куы дзура, уæддæр.
Бирæтæ фæндæгтыл цæуæг сты хæдтулгæ машинæты, æмæ иу бæрæгбоны къуыри æгъдауы мидæг аназын кæй зæрды уа, уый йæ хæдтулгæ хæдзары ныууадзæд. Ис бирæ такситæ, ис гæнæн чи нæ нуазы ахæм зонгæ кæнæ хæлар дæ баласа хæдзармæ. Ма сфæнд кæн нозтджынæй машинæ скъæрын, ма бафтау фыдбылызы дæхи дæр æмæ искæйы дæр. Куыд хъуыды кæнæм, уымæй нæм æмхицдæр у. Адæймаджы цард аскъуынынæй æппæты карздæр æфхæрд хуыздæр у. Барадхъæхъхъæнджытæй курæм, цæмæй уыцы бонты расыггæнджыты зæрдæхудтæй æппындæр ма тæрсой, сæ куыст куыд æмбæлы, афтæ кæной.
Уæ хорзæхæй, балæггад кæнæм нæ кæстæртæн, раздæхæм сын се’ргом нæ фыдæлты æвидийгæ Фарн æмæ Æгъдаумæ! Уымæй cуыдзысты тыхджындæр, ныфсджындæр æмæ царды мидæг æнтыстджындæр.
Уастырджийы хорзæх уæ уæд! Нæ фæсивæд йе уазæг!
Кучиты Руслан,
Иры Стыр Ныхасы сæрдар
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Комментарии (0)
-
-
0 / 0
-
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?