Уарзон у горæты ногдзауты парк канд нæ чысыл хуртæн нæ, фæлæ хистæр кары адæймæгтæн дæр. Раст у, парк ныры домæнтæн дзуапп нæ лæвæрдта, хуыздæрхъуаг уыд йæ аивдзинад, фаг дзы нæ уыд, сабитæ сæхи кæм ирхæфстаиккой, ахæмтæ. Фæлæ уæддæр, уыцы цухдзинæдтæм нæ кæсгæйæ, ардæм кæддæриддæр фæцæуы бирæ адæм æмæ дзы уæддæр сæ рæстæг фервитынц хъæлдзæгæй, фæирхæфсынц сæхи хъеллаугæнæнтæ æмæ æндæр ахæмтыл.
Сабитæ сæ ныййарджытимæ æввахс рæстæджы æвдисæн уыдзысты, парк йæ хуыз кæй скалдзæн, дзæвгар хиирхæфсæнтæ сын сæ лæггады хай кæй кæндзысты, уымæн. Хъуыддаг уый мидæг ис, æмæ парк схæрзарæзт æмæ йæ æмбæлон уагмæ æркæныныл ацы бонты кусы фирмæ «Викас». Ацы фирмæ сырæзт Дыгъуызты Бесойы хъæппæрисæй æмæ æрбынат кодта хъæдгуысты комбинаты. Уый нæ горæты арæзтадон-цалцæггæнæн куыстытæ æххæст кæнынæн уадзы алыгъуызон продукци, уыцы нымæцы цалдæр хуызы плиткæ, стæй бордюртæ æмæ æндæр ахæмтæ. Сты аив æмæ рæсугъд, гъæдджын æмæ сæ фæлхасгæнджытæ æлхæнынц зæрдиагæй. «Викас»-ы кусджытæ канд бынаты нæ кæнынц хъæппæрисон архайд, фæлæ ма горæты тротуартыл дæр разыны се 'рмдзæф. Цæвиттон, амæйразмæ плиткæтæй рафидауын кодтой Хъайтарты уынджы тротуарты иу хай.
Ныр та æнæзæрдæхудтæй фæллой кæнынц парк схæрзарæзт кæныныл. Кæд æм нырма æрæджы бавнæлдтой, уæддæр сын дзæвгар бантыст.
Фирмæйы бригадир Дыгъуызты Дауыт куыд банысан кодта, афтæмæй дзы æдæппæт фæллой кæны 16 адæймаджы æмæ сын сæ куыстмæ нæй фау æрхæссæн. Ныртæккæ уал дзы аразынц тротуартæ. Райдианы йыл æркалынц хуыр, йæ фæйнæ фарс ын æвæрынц бордюртæ. Сæйраг тротуарты фæтæн у 510 сантиметры, иннæтæ та уыдзысты на-рæгдæр. Уыцы куыстытæ ахицæн кæныны фæстæ сæ рафидауын кæндзысты плиткæйæ.
Парчы арæзт æрцæудзæн фонтан æмæ бассейн дæр, æмæ уыдон стыр æхцондзинад æрхæсдзысты нæ рæзгæ кæстæртæн. Кæд сæ фадат амона, уæд хиирхæфсæнты бынат дæр æркæндзысты æмбæлон уагмæ. Нæ сæ ферох уыдзæн æмбонд схæрзарæзт кæнын дæр. Кæд сын æхцайы фæрæзтæ рахицæн кæной, уæд æй цалцæджы бæсты æнæхъæнæй раивдзысты ногæй. Уыдзæн дзы кулдуар дæр. Намысджын куыст кæнынц Дыгъуызты Инал, Валери, Уалыты Валикъо, Дыгъуызты Петр æмæ æндæртæ.

ХУЫБИАТЫ Н.

"Хурзаерин"