Наркомани - адæмы знаг
Республикæйы наркоконтролы кусджытæ фæдис хъæр кæнынц: наркоманты нымæцыл бонæй-бонмæ æфты. Тыхджындæр кæны нар-котикты æнæзакъон змæлд, кæд сæ ныхмæ карз тох цæуы уæддæр. Управленийы кусджытæ цы бæрæггæнæнтæ бахыгътой, уым цы фараст азы кусынц, уыцы рæстæг рабæрæг кодтой цыппар минмæ æввахс фыдракæнды, куынæг æрцыдысты сæдæгай тоннæтæ наркотикон буарыгъæдтæ. Ныртæккæ наркологон диспансеры хыгъды ис 2600 рынчыны, фæлæ се 'цæг нымæц у бирæ фылдæр. Ивгъуыд аз ма уыцы нымæцыл бафтыд 200 рынчыны.
Паддзахадон наркоконтролы Федералон Управленийы Цæгат Ирыстоны хайады хицау Бичегкуты Мæирбеджы хъуыдымæ гæсгæ йæ сæйраг аххосаг у, афтекты кæй уæй кæнынц, кодеин кæм ис, ахæм препараттæ. Уыдонæй иууыл тæссагдæр у дезоморфин. Официалон æгъдауæй ацы хостæ наркотиктыл нымад не сты, фæлæ уыдонæй фæстæ дæр нæ лæууынц.
Уыдон тыххæй хъæугæ закъон хаст куынæ 'рцæуа, уæд бæллиццаг нæ уыдзысты йæ фæстиуджытæ.

Ныййарæджы капитал бизнесы гуырæн нæу
Паддзахад аразы æппæт фадæттæ дæр, цæмæй демографион уавæр нывыл уа, уый тыххæй.
Уыдонæй иу у ныййарæджы капитал дæр. Уый у хорз ахадгæ ‘ххуыс бинонтæн. Фæлæ та уымæй дæр бирæтæ сæхицæн пайдайы гуырæнтæ сарæзтой. Æргом сидынц ныййарджытæм, ныфс сын æвæрынц се 'хца рæстæгыл райсынæй, кæй зæгъын æй хъæуы, кæд сын йæ фылдæр хай радтай, уæд.
Æппæт уыдæттæ катайы æфтауынц æмбæлон органты. Карз тох цæуы закъонхалджыты ныхмæ.
Цæмæй цæстфæлдахджыты хызы мачи бахауа, уый фæдыл Дзæуджыхъæуы, стæй районты пенсион фондты хайæдты арæзт æрцыд ныййарджытæ æмæ фидæны ныййарджытимæ комкоммæ бастдзинад.
Уырдыгæй райсæн ис хъæугæ информаци, ныййарæджы капитал куыд райсæн у æмæ йæ цæуыл бахардз кæнæн ис закъон нæ фехалгæйæ, уый фæдыл. Арæзт ма цæуынц пенсион фонды хъæппæрисæй фембæлдтытæ, консультацитæ сертификатты хицæуттимæ, стæй сæ райсинаг чи у, уыдонимæ.
Уыимæ ма пенсион фонды кусджыты зæрды ис, нырæй фæстæмæ ахæм фембæлдтытæ гуырæнхæдзæртты аразын дæр, цæмæй æмба-рæн куыст кæной фидæны мадæлтимæ.

Æнæниз цардыуагмæ - фылдæр æргом
Республикæйы стыр æргом здæхт цæуы сывæллæтты æнæниздзинадмæ, æнæниз цардыуаг парахат кæнынмæ. Уый цæмæй къухы бафта, уымæн стыр ахъаз у спорт.
2012 аз Дзæуджыхъæуы нымад æрцыд Сывæллæтты æнæниздзинады азыл. Уый фæлгæтты уал Дзæуджы-хъæуы бынæттон администрацийы хъæппæрисæй Лескен æмæ Сырх Дыгуры хъæуты арæзт æрцыд спортивон фæзтæ, дарддæр куыст цæуы, цæмæй ахæмтæ фæзына иннæ районтæ æмæ хъæуты дæр.
- Кæд нæм спонсортæ фæкæсой, уæд рæстæгыл арæзт æрцæудзысты ахæм фæзтæ æндæр рæтты дæр, - загъта Дзæуджыхъæуы администрацийы инвестицион проектты Управленийы хицау Дзоблаты Зураб. - Уый у спорты рæзт æмæ æнæниздзинад фидар кæныны программæйы пункттæй иу. Хицауад аразы æппæт фадæттæ дæр, цæмæй фылдæр сывæллæттæ се 'ргом раздахой спортмæ.
Сывæллæттæ спорт тынгдæр бауарздзысты, физикон фæлтæрæнтæ хъазты хуызы лæвæрд куы цæуой, уæд.
Сывæллæтты фидæн хистæртæй аразгæ у æмæ архайын хъæуы, цæмæй нæ бæстæйæн æнæниз цæрджытæ хъомыл кæна. Физкультурæ æмæ спорты рæзт - уый у ахсджиаг тых æрыгон фæлтæры хъомылады. Афтæ куы уа, уæд фæсивæды не 'вдæлдзæн нозт æмæ наркоманийыл хъуыды кæнынмæ. Паддзахады 'рдыгæй æрыгон фæлтæрмæ ахæм хъусдард куы уа, уæд нын уыдзæн æнæниз æмæ рæсугъд фидæн.

Амалхъомтæн æххуысæн
Бæрæг куыд у, афтæмæй Дзæуджыхъæуы байгом уыдзæн æрыгон амалхъомтæн æххуысы бизнес-центр. Кусдзæн дзы бизнесы фæлтæрд специалисттæ. Уым сæрмагонд курсытæ рацæудзысты амалхъомады фыццаг къахдзæфтæ чи кæны, уыдон.
Нырмæ æдзух алыхуызон лыггæнинаг фарстатыл чи 'мбæлд, уыдон ныр райсдзысты æппæт зонæнтæ дæр. Зæгъæм, бизнес-пълан ныффыссын, паддзахадæй материалон æххуыс райсын, федералон æмæ республикон программæты архайын æмæ бирæ æндæртæ.
Бизнес-центры специалисттæ куыд зæгъынц, афтæмæй ныртæккæйы царды хисæрмагонд чысыл бизнес скæнын у бирæтæн сæ бинонтæ фæдарыны иунæг фæрæз. Уымæ гæсгæ консультацитæ кæм райсай, ахæм центр у æнæмæнгхъæуæг. Райдайгæ амалхъомтæн зын у æвæлтæрдæй ахæм бæрндзинад хæссын æмæ сын ахæм бизнес-центр хъуамæ суа зонындзинæдты гуырæн.

ДЖУСОЙТЫ Нинæ

"Хурзаерин"