Эксплуатацимæ лæвæрд цæуынц ног объекттæ
Нæ республикæйы Президенты хæстæ æххæстгæнæг Вадим Бровцев ауагъта æмбырд республикæйы министрæдтæ æмæ ведомствоты, афтæ ма паддзахадон унитарон куыстуæтты къухдариуæггæнджытæн.
Уыдон хыгъд радтой Республикæйы æндидзынады процесс æмæ горæт Цхинвалы хæрзарæзтады фæдыл бакæнгæ куыстыты тыххæй. Культурæйы министр Кокойты Махарбег куыд фехъусын кодта, афтæмæй Хетæгкаты Къостайы номыл паддзахадон драмон театр æмæ паддзахадон ансамбль «Симд»-ы бæстыхæйтты арæзтадон куыстытæ цæуынц æмбæлонæй, æнæ къуыхцыйæ. Афтæ ма алыварсонæй цалцæг цæуынц музыкалон æмæ аивадон уагдæттæ дæр. Æнæниздзинад æмæ социалон рæзты министр Уалыты Ларисæ куыд банысан кодта, афтæмæй Дзауы поселочы æмæ Дзауы районы арæзт цæуынц рынчындæттæ. Æмæ ног мæйы та эксплуатацимæ лæвæрд æрцæудзысты Знауыр æмæ Ленингоры поселокты рынчындæттæ.
Хуссар Ирыстоны арæзтадон проекттæ реализаци кæныны паддзахадон комитеты сæрдар Къæбысты Зураб куыд загъта, афтæмæй 15 февралмæ эксплуатацимæ лæвæрд æрцыдысты 31 объекты æмæ 48 объекты та эксплуатацимæ радтын фæнд кæнынц 1 мартмæ. 15 мартмæ эксплуатацимæ лæвæрд æрцæудзысты 37 ногарæзт объекты. Къæбысты Зураб ма куыд фехъусын кодта, афтæмæй проблемæтыл æмбæлынц горæт Цхинвалы Дзуттæгты кварталы арæзтадон куыстытæ кæныны.
«Абоны бон уым объектты куыстытæ дихгонд нæ цæуынц æмæ цæрджытæ фæндон хæссынц, цæмæй хæдзæртты арæзтады сæхæдæг хайад исой æмæ сæ сæхи фæндонмæ гæсгæ адих кæной кæрæдзийыл», - банысан кодта Къæбысы фырт.
Президенты хæстæ æххæстгæнæг куыд загъта, афтæмæй Дзуттæгты кварталы хæдзæрттæ лæвæрд æрцæудзысты паддзахадон исадмæ æмæ æппæт хæдзæрттæ дæр дихгонд цæудзысты цæрæнуатон къамисы фæткмæ гæсгæ. Вадим Бровцев æмбæлон аргъ скодта паддзахадон комитеты куыстæн.
Нæ республикæйы фæндæгты, капиталон арæзтад æмæ архитектурæйы министр Джиоты Рудольф та æрбамбырдуæвджытæн фехъусын кодта, ныртæккæ горæт Цхинвалы Димитровы, Фидауынгæнджыты, Заводы, Тæболы фырты æмæ Сталины уынгтыл кæй цæуынц æххæстгонд канализацион хæтæлты цалцæггæнæн куыстытæ.
"Хурзаерин"
Мы рекомендуем Вам зарегистрироваться либо войти на сайт под своим именем.