Цыфæнды хорз хæстæй, дам, æвзæр фидыд хуыздæр у. Хæст æнамонддзинад хæссы алкæмæн дæр, иуæй туг куы миза, уæд иннæмæй дæр æхсыр нæ миздзæн. Алы хæст дæр фæвæййы фидыдæй, фæлæ хæст цахæм уа, фидыд дæр хъуамæ ахæм уа, бæлвырддæр зæгъгæйæ, цы хуызæн дзуар уа, ахæм чъиритæй йын скувынц.

Августы тугуарæн хæстæй нырма æртæ азы йедтæмæ нæ рацыд, фæлæ ныридæгæн хъуысын райдыдта нæ цыфыддæр знæгтимæ бафидауыны кой. Уыцы койтæ, кæй зæгъын æй хъæуы, сыгъдæг быдыр саразын кæмæй хъавыдысты, уыцы пиллонкалæг горæты фондз боны дæргъы йæ сабиты йæ гуырæй чи æмбæрзта, уыцы зæрдæрыст адæмæй нæ хъуысынц, фæлæ уыцы хæстмæ дардæй чи каст, йæхиуыл æй чи нæ бавзæрста, ахæмтæй.
Зæгъæм, газет «Рæстдзинад» цитатæ хæссы хъуыстгонд киноактер Гоша Куценкойы ныхæстæй:
«Æвирхъау цауты архайджыты цоты цот фидæны иу фынгыл кæй баддзысты, уый мæ уырны». Ома, махмæ сыгъдæг быдыр аразынмæ чи æрбацыд, уыцы гуырдзиæгтæ, æмæ уыдонæй йæ сабиты чи хъахъхъæдта, уыцы ирæтты цоты цот.
Уый циу? Рекламæ? Цы уыд, уый ферох кæнын æви чи нæма байгас, уыцы риссаг хъæдгæмттыл цæх зæрын?!.
Гоша Куценко махæн, ирон адæмæн æцæгæлон у, уый нæ зоны 20-æм азы трагеди, йæ фыдæлтæй дзы ничи бабын, йæхиуæттæ, йæ къабæзтæй йын удæгасæй никæй баныгæдтой, Зары æфцæгыл ын никæй амардтой. Фæлæ йын йæ ныхæстæ мах газетмæ цæмæн хæссæм, цы æнæмæнгхъæуæг хъуыддаг у, цæмæн къахæм нæ кæрæдзийы зæрдæтæ?..
Уый цы нысан кæны? Мах хъуамæ уырнын кæнæм нæ цотæн, цæмæй уыдон та сомбон сæ цотæн уырнын кæной, гуырдзиæгтимæ сын иу фынгыл бадгæ кæй у, уый? Æмæ уый раст политикæ нæу, уый у æнæсæрфатдзинад, нысан кæны историйы туджы малы нытту кæнын…
Ссæдзæм азы нын нæ уæзгуыты арты хæй чи бакодта, уыдоны цоты цотимæ мах, кæй цагътой, уыдоны цоты цот – бадтыстæм иу фынгыл, æмæ цы? Уый тыххæй нæ нæ цагътой æмæ нæ ныццагътой?
Кæй зæрдæ нæ агуры хъарæг, уый зарæд йæхи фæндиаг, йæ хъарæджы къуыбылой йæ хъуыры кæмæн ныффидар, уый та уадзæд йæ адыл.
Æгæр та скарз æнæсæрфат политикæ. Фæйнæрдæм айхъус, уæд: Саакашвили – æнаккаг, гуырдзиæгтæ – зæдтæ! Афтæ нæу. Махæн не знæгтæ сты гуырдзиæгтæ, иу лæг цыфæнды тугмондаг ма уа, уæддæр æнæхъæн адæмæн геноцид нæ сараздзæн. Адæмæн сæ туджы цы уа, æндæр адæммæ сын цы æнæуынондзинад уа, уый равдисынæн иугай лæгтæ фæндаградтæг вæййынц æрмæстдæр. Махæй искæй уырны, Зары æфцæгыл хæстæй лидзæг зæрæдтæ æмæ сабиты раз тæппуд куыйтау хъузоны чи бабадт, æмæ сæ сухты цагъд чи ныккодта, уыцы гуырдзиаг лæгмарты Зары æфцæгмæ Эдуард Шеварднадзе кæй сæрвыста? Никæй. Уыдон Зары æфцæгмæ схаста сæ фашистон зæрдæйы уаг, ирон адæммæ æнусон æнæуынондзинад.
Бафидауынæн дæр лæгдзинад хъæуы.
Афтæ ничи зæгъдзæн, Гуырдзыстон æмæ Хуссар Ирыстоны ‘хсæн æнустæм сындзтелæй æхгæд арæн хъуамæ уа. Абон уа æви райсом, уæддæр не ‘хсæн цыдæр ахастытæ хъуамæ уа. Мах хъуамæ бамбарæм иу хъуыддаг: Гуырдзы не ‘нусон, нæ цыфыддæр знæгтæ сты, фæлæ нын сæ Хуыцау радта сыхæгтæн. Мах уыдоны тыххæй нæ зæххæй никæдæм фæлиддздзыстæм, уыдон та - мах тыххæй. Не ‘хсæн хъуамæ уа политикон, экономикон, базарадон ахастытæ. Фæлæ æрмæстдæр ахастытæ. Нæ фæндагыл цæуын дæ фæнды, исты ласинаг дын ис? Табуафси – дæ паспорт бавдис, дæ илцы хай бафид æмæ фæстæмæ дæр мауал фæкæс, афтæмæй дæ фæндаг – раст.
Исты уæййаг дæм ис? Табуафси, æрлæу базары, бабазар кæн, стæй дæ афтид асыччытæ багкой кæн æмæ дæ цæст дæр куыд нал ауына. Нæ дæр фылдæр, нæ дæр къаддæр.
Фæлæ уыдæттæн уæвæн ис æрмæстдæр уæд, Гуырдзыстон æнæхъæн дунейы раз официалонæй куы басæтта, цалдæр геноциды нын кæй сарæзта, ууыл, æмæ нын куы банымайа нæ хæдбардзинад.
Иу фынгыл бадын та…
Куыдзы бæлæгъы хæрæд ахæм ирон лæг, йæхи æмæ йæ фыдæлты туджы тæфмæ смудгæйæ ма знаджы къæбæр чи бахæра!
ГÆБÆРАТЫ Юри