… Цæмæй хъæу ма федзæрæг уа
23 мая 2018 Новости [версия для печати] [читать комментарии] [размер шрифта: a- | А+] [1147 просмотров]
Бехъмары хъæу, Ирыстонæн йæ хуссар хайы иннæ хъæутæм абаргæйæ чысыл нæу. Фæстаг рæстæджы йæм æндæр хъæутæй дæр æрлыгъдысты æмæ фестырдæр. Хъæу дих кодта, Дæллаг, Уæллаг æмæ Астæуккаг Бехъмарыл.Ацы уацы мæ дзырды сæр Уæллаг Бехъмарыл у. Ам хицæн колхоз уыд. Хъæуы цард æртын æртæ хæдзары: 4 хæдзары — Къуылыхты мыггагæй, 2 хæдзары — Уанеты мыггагæй. Иннæ 28 хæдзары та Чехойтæй уыдысты. Чехойты хъæу дæр ма йæ уымæн хуыдтой.
Хъæуæн йæ æрдзон равæрд у тынг рæсугъд. Сæрвæттæ, хуымзæххытæ — бирæ. Зайы дзы алыгъуызон зайæгойтæ, у дыргъджын бынат. Уæлдай фылдæр дзы зайы кæрдо æмæ æнгузбæлæстæ.
Хъæумæ къуылдымæй куы ‘ркæсай, уæд мæнæ цыма уæрцц йæ ахæстоны æрныгъуылд, афтæ зыны адæймагмæ. Зымæг дзы тыхдымгæтæй тас нæу. Фæйнæрдыгæй йæ хъахъхъæнынц хъæдтæ æмæ къуылдымтæ. Советон хицауады райдиан азты, колхозон арæзтады рæстæджы, хъæуы цæрджытæй алчи дæр йе ‘вæрæн хаста иумиаг хæдзарадмæ куыд фосæй, афтæ кусæнгæрзтæй дæр. Æнахуырдзинад скуынæг кæныны охыл дзы баконд æрцыд ликбезтæ, хистæр кары цæрджытæй кæсын-фыссын чи нæ зыдта, уыдонæн. Хъæуы уыд бирæ сывæллæттæ. Ныры æвзонг цардæмбæлттæ хъуамæ бафæзмиккой мæнæ ахæмты: Чехойты Ясон æмæ йе ‘мкъай Фидонайы — уыдис сын 10 сывæллоны. Чехойты Гиуæрги æмæ Санахъуенæн, Чехойты Миха æмæ Кикайæн, Къуылыхты Резо æмæ Нежнайæн — æстгай сывæллæттæ. Къуылыхты Васил æмæ Еличкайæн — авд, Чехойты Яша æмæ Феняйæн авд Чехойты Патъонкъа æмæ Тъасайæн — 6,. Чехойты Пармен æмæ Тебройæн — фондз. Стæм хæдзæрттæй дарддæр дзы æртæ сывæллонæй къаддæр никæмæн уыд.
Стыр Фыдыбæстæйон хæст куы райдыдта, уæд хъæуæй цыфыддæр знаджы ныхмæ тохмæ ацыд бирæ фæсивæд, бирæ хæдзæрттæй æртыгæйттæ, цыппæргæйттæй, зæгъæм, Чехойты Шакройы лæппутæ цыппарæй: Гиуæрга, Газан, Закъоци, Васо. Чехойты Ванойы лæппутæ дæр цыппарæй — Пармен, Илуша, Вася, Титикъо. Чехойты Ефимы лæппутæ æртæйæ — Хъасбол, Вардан, Лада. Уанеты Мошкъайы лæппутæ дыууæйæ — Ваня (Саулæг) æмæ Александр. Чехойты Пармен æмæ йæ фырт Илыкъ.
Хъæубæстæ тугуарæн хæстмæ кæй афæндараст кодтой, уыдонæй cæ фыдыуæзæгыл нал сæмбæлдысты Чехойты Самсон, Чехойты Закъоци, Чехойты Титикъо, Чехойты Пармен, Чехойты Илакре. Чехойты Лади, Уанеты Ваня (Саулæг), Чехойты Гиуæрга, Къуылыхты Федыр, Къуылыхты Шота, Къуылыхты Вася, æфсымæртæ Чехойты Къарго æмæ Яша, Чехойты Захар. Къарго æмæ Яшайы мад Нуци иунæгæй æвæгæсæгæй баззад æмæ йæм йе ‘ххуысы къух фæдаргъ кодта Чехойты Илуша, уый дæр хæсты хайадисæг уыд. Йæ хъæдын бæстыхай сыхæлдта æмæ йæ хъæуы астæу сылгоймаджы хæдзары фарсмæ сæвæрдта.
Уанеты Мошкъайæн йæ иннæ фырт Александр тохы быдыры ныууагъта йæ дыууæ къахы, афтæмæй ма сæмбæлд йæ бинонтыл. Йæ иунæг фырт Гиуæрги та йын Гамсахурдиайы сæркъуыртæ амардтой Цхинвалы. Фронтæй ма цæфтæй æрыздæхтысты; Чехойты Тугъан, Чехойты Газан, Чехойты Серго, Чехойты Серож. Æртыгай-цыппæргай сывæллæтты мæдтæ Цхуырбаты Женя, Икъоты Лизо, Плиты Ивлитъа, Чехойты Феня фæидæдз сты. Гъе, уый дын тугуарæн хæсты фæстиуджытæ Бехъмары хъæуæн.
Фæцис хæст. Цард дарддæр йæ цыды хай кодта, уæдæ цы! Фæсхæст тохвæллад хæстонтæ хъæуы иннæ цæрджытимæ счъилдысæй бавнæлдтой иумиаг куыстмæ. Колхозæн нæ уыд къанторæ æмæ цыбыр рæстæгмæ арæзт æрцыд дыууæуæладзыгон бæстыхай, бынаг уæладзыг — хордонæн, дыккаг уæладзыг та — колхозы правленийæн. Иузæрдион куыст кодтой быдырты, фер-мæйы, дыргъдæтты. Фермæйы дардтой куыд лыстæг, афтæ ставдкъах фос дæр, уыимæ хуытæ, бæхтæ, къамбецтæ. Кæрчыты фермæ сын уыд хицæнæй, дардтой мыды чыргъæдтæ, зæлдаг чи тухы, ахæм къуыдыркæлмытæ дæр. Цы зæлдаг тыхтой, уыдон хицауадмæ лæвæрдтой. Сæкæры цæхæрайы куыст чи кодта, уыдон та-иу сæ куысты мыздмæ райстой сæкæр.
Фæсхæст найгæнæн комбайнтæ нæма уыд æмæ-иу мæйгæйтты,чъеурийæ мусты най кодтой æфсирон культурæтæ.
Афтæ хъазуатон куыст кодтой хъæуы цæрджытæ — цард дзы цæджджинагау фыхт, кæрæдзи уарзтой, кæрæдзийæн аргъ æмæ кад кодтой.
Хæдзарадæн дзæвгар рæстæг арæхстджынæй разамынд лæвæрдта Чехойты Яша. Хъæумæ электроэнерги бауагътой 1965 азы æмæ цæрджыты цинæн кæрон нал уыд.
Рæстæг йæ цыды хай куыд кæны, афтæ ивындзинæдтæ хæссы цардмæ. Хъæуы цæрджытæ иугай-дыгай, хуыздæр царды уавæртæ кæм уыд, уырдæмыты сæ цæрæнбынæттæ ивтой. Ирон æмбисондау — мæсыгæй, дам, иу дур куы рахауы, уæд иннæ дуртæ дæр згъæлын райдайынц йæ фæдыл. Афтæмæй хъæу æдзæрæг райдыдта. Ныртæккæ ма дзы цæры дыууæ хæдзары. Чехойты Азæмæт дардыл уæрм скъахта, æфсæйнаг цæджындзтыл хæдзар сæвæрдта, стæй уæрммæ дон рауагъта æмæ хæдзар цады астæу февзæрд. Кæсаг дзы ауагъта æмæ балкъонæй æнгуыр ныппар æмæ кæсаг слас…
Чима дзы цæры, уыдон зындзинæдтæ ‘взарынц, электроны рухс сæм 2016 азæй кæй нæ судзы, уый тыххæй. Дæллаг Бехъмарæй, трансформатор æвæрд кæм ис, уырдыгæй уæллаг Бехъмармæ, бирæ-бирæ дыууæ километры дæрддзæгæн йедтæмæ нæу.
Электрохахх хъæуы цалцæг кæнын, кæннод та ногæй аразын. Иннæ æнæхъæн Бехъмары хъæуæн сæ уæлмæрд ис уæллаг Бехъмары æмæ мард йе ‘нусон бынатмæ фæхæццæ кæныны рæстæджы, кæнæ мардæн йе стыр бонты, уæлмæрдмæ цæуын ингæнмæ базилыны тыххæй зианджын адæм зындзинæдтæ æвзарынц, фæндаг æдзæллаг уавæры кæй ис, уый тыххæй. Хъæуæй æндæр рæттæм цæрынмæ чи рацыд, уыдонæй ма сæ иутæн уым ис цæхæрадæттæ. Лæг кæм райгуырд, фыццаг къахдзæфтæ кæм акæна, кæм схъомыл уа, уыцы фыдыуæзæг ын мадау адджын у, æлвасы йæ йæхимæ, кæмфæнды ма цæра, уæддæр.
Хъæуы электроны рухс куы судзит, фæндаг æм арæзт куы æрцæуид, уæд ахæм хъæу хъæууат нæ фæуид.
ЧЕХОЙТЫ Вася, куысты ветеран
http://new.xurzarin.ru/caemaej-xaeu-ma-fedzaeraeg-ua/
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Комментарии (0)
-
-
0 / 0
-
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?