Æнусон низы риссаг
28 июля 2012 Общество [версия для печати] [читать комментарии] [размер шрифта: a- | А+] [4198 просмотров]
Дуджы цæвæнтæн дур дæр нæ фæразы, мах цы дуджы цæрæм, уымæн - уæлдайдæр. Зæххы къори мæцы йæ туджы, фæлæ уыцы туг хæстæндзарджытæй нæ тæдзы, æнæаххос адæмы, америкæйаг цинизмы амæттæгты туг у. Иугонд Штаттæ нал æмбæхсынц сæ тугмондаг фæндтæ, кæд ма æфсонæн мæнг демократийы гамхуд скæнынц, уæддæр. Йæ рæстæджы йæ аив загъта Къусраты Егнат. «Æз нæ раст кæнын Саддамы, фæлæ иууыл растдæр уаид, уым, Гаагæйы тæрхоны Буш йæхæдæг дæр куы бадид». Йæ мидис: кæд лæгмартыл тæрхон хъæуы, уæд - иумæ. Иракы президент азымджын уыд æви нæ, уый ныр никæйуал æндавы, фæлæ йын мæлæты тæрхон чи рахаста, уыдон дзуапп ратдзысты, туджы зæйты бын кæй фæкодтой, уыцы адæмы тыххæй?.. Ныгуылæны зæрдæмæ чи нæ цæуы, уыцы бæстæты исчи йæ куыдзæн рæстæгыл холлаг нæ ныккодта, зæгъгæ, уæддæр цъиувæдис сисынц: демократи уæм нæй! Фæлæ тугмондаг Саакашвилийы адæмы цæгъдынæн хæцæнгарзæй кæй ифтонг кæнынц, уый сын демократи у. Туджы лæсæнтæ рауагътой Мысыры, Ливийы, Сирийы æмæ афтæ дарддæр. Се 'фсон демократи у, афтæмæй сæ хъæуы æрмæстдæр нефт, зæххы къорийыл уæлбикъон æрмæстдæр уыдон кæй сты, уый равдисын сæ фæнды. Мах, ирон адæм та куыд кæнæм, цы кæнæм? Нæ бон у ацы мæнг дунейы фæтк æрæвæрын? Нæу. Фæлæ хъуамæ хъуыды кæнæм нæ национ интерестыл, тыхсæм нæ сомбоныл. Сирийаг ирæттæ нæм фæдисы хъæр кæнынц, фæнды сæ хæсты цæхæрæй сæхи фервæзын кæнын, сæ фыдæлты зæхмæ цæрынмæ æрцæуын. Сидынц нæм, курынц нæ æххуыс, фæлæ сын цавæр зæрдæйæ хъусæм сæ фæдисы хъæрмæ? Уыдон разæй хъуамæ Ирыстон ныккодтаид фæдисы хъæр, Ирыстон сæм хъуамæ фæсидтаид, Ирыстон сæм хъуамæ бахатыдаид, цæмæй æрцæуой сæ фыдæлты бæстæмæ. Æмæ æнæхъæн дунейы нæ авторитет сырæзтаид.
Фæлæ…
Фæлæ…
Мах цагътой гуырдзы. Цæмæн, цы аххосджын фестæм сæ разы? Ницæмæй. Нæ аххос ис æрмæстдæр уый мидæг, нымæцæй сæ къаддæр кæй стæм. Хуссар Иры цæрæг ирæттæ иу милуаны бæрц уæддæр куы уыдаиккой, уæд нæм гуырдзы хæцынмæ нæ, фæлæ лæгъзтæмæ æрбацыдаиккой, цæмæй хæдбардзинад расидтаиккам. Кæд æй бамбардзыстæм, æдых тыхджыны раз æрмæстдæр йе 'дыхæй кæй у азымджын. Национ идейæ кæмæ нæй, йæ адæмы нымæц фæфылдæр кæныныл чи нæ архайы, йæ адæмы æрбамбырд кæнынмæ чи нæ тырны, уыцы адæмæн сомбон нæй. Къуындыхаты Муссæ йæ рæстæджы раст бакодта æви нæ, уый абон зын рафæлгъауæн у. Фæлæ сайдвæстаг цы ирæттæ фесты, уыдоны байзæттаджы фæстæмæ Ирыстонмæ æрхоныны тыххæй Ирыстон цы сарæзта ахæм дæргъвæтин рæстæджы дæргъы?!. Истори та фæлхатт кæны. Кæддæр Хъобангомы Алыккаты Хазби дыуу æдоныастæу йæ туджы куы мæцыд, уæд æххуысмæ сидт Ирыстоны иннæ кæмттæм, фæлæ йæм фæдисон зынæг нæ фæцис.
Чеселтгомы Коцты Бега Хъолайы мæсыджы цалдæр хæстонимæ арты куы сыгъд, уæд дæр афтæ! Ирыстоны иннæ кæмттæ куырмæфсон скодтой. Ныр та нæм нæ сирийаг æфсымæртæ сидынц æххуысмæ. Ирон та кæмдæриддæр ирон у, уымæн æмæ туг туг у. Де 'фсымæр дæм æххуысмæ куы сида æмæ йæм æххуысы къух бадарын куы нæ бафæразай, уæд цыхуызæн æфсымæр дæ! Стæй ам дзырд абоны уавæрыл нæ цæуы, дзырд нæ фидæныл цæуы. Абон мах нæхæдæг дæр тыхст стæм, фæлæ нæм сыдæй ничи ма амард, истытæ кæниккам. Ахъуыды ма кæнæм: æгас дунейыл куы айхъуысид, нырма бынтон тыхст уавæры чи ис, уыцы чысыл Хуссар Ирыстон йæхимæ хоны йе 'мтуг, йе 'мыстæг адæмы, уæд нæ кад кæйонг сырæзид. Стæй ахъуыды кæнæм ууыл дæр, уыдон искæмæн уаргъ уой, уый сæ сæрмæ кæй никуы бахæсдзысты. Уыдон уарзынц кусын, фæллой кæнын. Мах та хъуагдзинад æййафæм алыгъуызон дæсныйæдтæй. Ахæмтæ æцæгæлон адæмы ‘хсæн цæмæн хъуамæ агурæм?.. Науæд… Сæ фыдæлтæ дæр æцæгæлон зæххыл кæмæн райгуырдысты, фæлæ мадæлон æвзаг æмæ национ традицитæ махæй хуыздæр чи бахъахъхъæдта, уыцы адæм цас ахъаз фæуаиккой нæ нацийы размæцыдæн. Мах хъуамæ абоны зынæй ма тæрсæм, куы йæ зонæм, уый нæ сомбоны хæрзиуæгæн у, уæд. Хъуамæ нæм, æппынфæстаг, уæддæр фехъуыса Хазби æмæ Бегайы фæдисы хъæр.
ГÆБÆРАТЫ Юри
Источник - Газета Хурзарин.
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?