Дзимыргомы зынгхуыст хӕстонтӕн цыртдзӕвӕн
12 мая 2020 Новости [версия для печати] [читать комментарии] [размер шрифта: a- | А+] [548 просмотров]
Фыдыбӕстӕйыл фӕдисы хъӕр куы айхъуысы, лӕгдзинад, Райгуырӕн бӕстӕмӕ уарзондзинад хъуыддагӕй равдисын куы бахъӕуы, уӕд, фӕдисы чи нӕ рацӕуы, барӕй чи бамбӕхсы, уыдонӕн нӕ номдзыд Къостайы хуыздӕр арфӕ уыд ӕмӕ у: «Уӕд усы кӕрдӕны мыггагмӕ фӕхӕт…». Ахӕм ӕгаддзинад сӕ сӕрмӕ не ‘рхастой Дзимыргомы нӕлгоймаг хӕстхъом адӕм дӕр, 1941 азы сӕм Фыдыбӕстӕйы Стыр хӕсты фӕдисы хъӕр куы байхъуыст, уӕд.Уӕд ацы комы уыд дыууадӕс хъӕуы: Горга, Баджин, Битъӕртӕ, Тогойтӕ, Къоратӕ, Хетъетӕ, Гуырцъытӕ, Дзӕццойтӕ, Цгъойтӕ, Пагӕтӕ, Биганатӕ ӕмӕ Мӕхъитӕ. Чысыл хъӕутӕ уыдысты, сӕ егъаудӕрты ссӕдз хӕдзарӕй фылдӕр нӕ уыд. Сӕ сӕйрагдӕр фыдӕбон уыд фосы куыст, сӕ чысыл колхозтӕ паддзахадмӕ лӕвӕрдтой дзидза, къуымбил, ӕхсыр, стуры ӕмӕ фысы цыхт. Сӕхицӕн дӕр фагӕй уӕлдай уыдысты. Фысвос фӕззӕгӕй уалдзӕгмӕ дардтой Хъызлары быдырты. Цы хуымзӕххы гӕппӕлтӕ сӕм уыд, уыдоны тыдтой хор, мӕнӕу ӕмӕ алыхуызон халсартӕ. Дардтой мыды чыргъӕдтӕ. Алцыдӕр сӕм уыд, ӕрмӕст сын нӕ фаг кодта хор ӕмӕ йӕ ӕлхӕдтой Цӕгат Ирыстоны. Уӕлӕдарӕс ӕмӕ кусӕндзаумӕттӕ дӕр фылдӕр ластой Дзӕуджыхъӕуӕй. Ардӕм дзы бирӕтӕ ралыгъд цӕрынмӕ, иннӕтӕ дӕр, сӕ цотӕй ахуыры фӕндагыл чи ныллӕууыд, уыдонӕн балхӕдтой хӕдзӕрттӕ.
Иу дзырдӕй, комы адӕм сӕ царды кой кодтой, лӕппутӕ устытӕ куырдтой, чызджытӕ моймӕ цыдысты, чындзытӕ цот кодтой. Фӕлӕ хӕст ӕбуалгъ у. Чи йӕ райдайы, уый сӕр дзы-иу ӕппӕты разӕй куы басудзид, бӕргӕ. Фӕлӕ афтӕ кӕд вӕййы. Дзимыры фӕсивӕдӕй дӕр хӕстмӕ чидӕртӕ барвӕндонӕй ацыд, иннӕты ӕрцагуырдта ӕфсӕддон комиссарад. Комбӕстӕ мардӕрцыды хуызӕн уыд, чындзӕхсӕвы, куывды, хъазты хъӕр никӕцӕй уал хъуыст. Уый нӕ фидыдта Дзимыргомыл: цыфӕнды уӕззау куысты фӕстӕ дӕр-иу фӕсизӕр макӕцы хъӕуы, макӕцы хӕдзары тъӕпӕнсӕрӕй ирон фӕндыры хъӕр ма райхъуыса, уымӕн уӕвӕн нӕ уыд. Бӕрӕгбӕтты та фӕсивӕды къӕрццӕмдзӕгъд ӕхсӕв-бонмӕ дӕр арыдта ӕнусон къӕдзӕхты комы. Ныр бӕстӕ ныссабыр, мадӕлтӕ ӕмӕ устытӕ, сӕ хӕстонты фӕстӕ кӕсгӕйӕ, сӕхи ӕхсадтой сӕ цӕссыгӕй. Лӕджыфыдхор Гитлерӕй сӕ маст исгӕйӕ, тардзӕгъдӕн кодтой. Сабитӕ, сӕ мадӕлтӕм кӕсгӕйӕ, ӕрӕнкъард сты. Хистӕртӕ ӕмӕ чызджыты уӕхсчытыл ӕрӕнцад колхозты уӕззау куыстыты уӕз дӕр: балӕууыдысты, хӕстмӕ чи ацыд, уыцы хъаруджын фӕлтӕры куыстыты уӕлхъус.
Дзимыры комӕй Фыдыбӕстӕйы Стыр хӕстмӕ ацыдысты Битъӕрты Уасо, Хетӕг, Сосо, Дундук, Гоша, Уасо, Къудза ӕмӕ Георги; Дзебысаты Пъауле, Григори, Гри, Гаппо, Аршакъо, Местъор, Амран, Баграт, Андро, Уани ӕмӕ Дзудзуни; Бедойты Алеко ӕмӕ Георги; Пагӕты Сасо, Рези ӕмӕ Шакри, Гуырцъыты Къоте, Аврам, Цъубыр, Местъор ӕмӕ Гытел; Тогойты Местъор, Габуша, Дзатте, Беки, Исакъо, Дакъо, Дундук ӕмӕ Георги; Къораты Местъор, Тембол, Миша ӕмӕ Арчил; Хетъеты Григол, Алексей ӕмӕ Аршак; Цгъойты Хми, Гаврил, Къуыдзы, Миша, Федыр, Мате, Никъала, Мила, Къакъуни, Гриша, Жожи, Шакри, Беки ӕмӕ Датикъо; Мӕхъиты Баграт, Беса, Шамил ӕмӕ Алекси.
Адонӕн сӕ фылдӕр сӕ цард радтой Райгуырӕн бӕстӕйы сӕрвӕлтау — сау гӕххӕттытӕ сау халӕттау тахтысты Дзимыргомы хъӕуты иу хӕдзары фӕстӕ иннӕмӕ. Кӕуын ӕмӕ зӕрдӕхалӕн хъарӕгӕй ком байдзаг. Ӕдзард хӕстонтӕн сӕ цот баззадысты сидзӕртӕй, чындздзон чызджытӕ — ӕнхъӕлмӕ кӕсгӕйӕ, зӕрӕдтӕ — ӕвӕгӕсӕгӕй. Мӕхъиты Уасойы цыппар фыртӕй ма ӕрыздӕхт иу — Шамил, кӕстӕр Алексийӕн та ус дӕр нӕма уыд.
Царды цы ӕрцӕуы, уымӕн фӕразын хъӕуы, фидӕныл, кӕстӕртыл хъуыды кӕнын хъӕуы. Фӕлӕ та Дзимыргомы цӕрджыты сыстын кодтой ӕмӕ сӕ ӕрцӕрын кодтой, мӕхъӕлы куы арвыстой, уӕд уыдоны хъӕуты. Уыдон куы суӕгъд сты, уӕд та ныххӕлиу сты Цӕгат Ирыстоны алы хъӕуты. Сӕ фылдӕр ӕрцардысты Дзӕуджыхъӕуы, Джызӕлы, Комсомольск ӕмӕ Санибайы дыууӕ хъӕуы. Ныр ӕртыккаг фӕлтӕр ам хӕссы йӕ рӕз, ацы хъӕутӕ сын сты сӕ райгуырӕн хъӕутӕ, сӕ цӕрджытӕ — се ‘мхъӕуккӕгтӕ. Фӕлӕ уӕддӕр нӕ рох кӕнынц, сӕ дзимыраг фыдӕлтӕй хӕсты быдыры чи баззад, уыдоны рухс нӕмттӕ.
Дзимыргоммӕ бацӕуӕны сын рӕсугъд, тъӕпӕн ран, Цгъойты хъугомы сӕвӕрдтам иумӕйаг цыртдзӕвӕн. Комы бирӕ мӕсгуытӕ ӕмӕ гӕнӕхтӕ ис. Иу мӕсыг дзы кӕсы иннӕмӕ, ӕмӕ-иу афтӕмӕй фӕдисы рӕстӕг суанг комы рӕбынмӕ фехъусын кодтой хабар. Знаджы фыдбылызы ныхмӕ-иу комбӕстӕ ӕрлӕууыдысты иумӕ.
Цӕмӕй ӕдзард хӕстонты цыртдзӕвӕн уыцы мӕсгуыты ӕхсӕн сфидауа, ууыл бацархайдтон зӕрдиагӕй. Кусгӕ та йыл кодтон ӕртӕ азӕй фылдӕр рӕстӕг Мӕскуыйы. Уым цӕрын, уым кусын 57 азӕй фылдӕр, фӕлӕ, куыд фӕзӕгъынц, мӕ фынты дӕр вӕййын Ирыстоны.
Мӕсгуытӕ арты ӕвзагӕй фӕдис куыд кодтой, уымӕ гӕсгӕ 7 метры бӕрзӕндӕн цыртдзӕвӕнӕн йӕ уӕллаг хай у мыдадзын цырагъы хуызӕн. Конд у, згӕ кӕуыл нӕ хӕцы, ахӕм ӕндонӕй. Уымӕй дӕр сыгъзӕринхуыз, титаны доны тылдӕй. Йӕ быны йын мӕсыг самадтам бынӕттон хохаг дурӕй. Йӕ фарсмӕ йын сӕвӕрдтам дыууӕ метры дӕргъӕн стъол бандонимӕ, згӕ чи нӕ кӕны, ахӕм згъӕрӕй.
Цыртдзӕвӕн-монумент авд метры бӕрзӕндӕн самадтам уымӕн, ӕмӕ ирон адӕммӕ нымӕц авд у табуйаг, фӕдзӕхсӕн. Мемориалон къӕйыл ӕдзард хӕстонты мыггӕгтӕ ӕмӕ нӕмтты номхыгъды уӕлӕ та сӕвӕрдтам алайнаг дзуарӕвӕрд.
Цыртдзӕвӕн-монументы мӕсыг амайыныл тынг бафыдӕбон кодта Хетъеты Эльбрус. Ӕххуыс ын кодтой Гуырцъыты Ӕхсар, Хынцӕгты Хъазыбег, Хетъеты Алан, Гуырцъыты Бало ӕмӕ мӕхӕдӕг — цыртдзӕвӕны автор. Уӕзласӕн машинӕйӕ нӕ сифтонг кодта Дзебысаты Майрӕм. Зынгхуыст хӕстонты номхыгъд скодта Цгъойты Хазби.
Хетъеты Миша,
техникон наукӕты кандидат,
Советон Цӕдисы паддзахадон премийы лауреат,
УФ-йы Хицауады премийы лауреат, дзимыраг
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Мы рекомендуем Вам зарегистрироваться либо войти на сайт под своим именем.
Комментарии (0)
-
-
0 / 11
-
Информация
Посетители, находящиеся в группе Гости, не могут оставлять комментарии к данной публикации.
Нашли ошибку?